Tariki ya 04 Nyakanga 1994, tariki ya 04 Nyakanga 2024, imyaka 30 irashize Igihugu kibohowe, Jenoside yakorerwaga Abatutsi irahagarikwa. Uyu munsi wari utandukanye ku bantu bitewe n’ibice by’Igihugu bari baherereyemo. Bamwe bari bihishe Interahamwe ahandi hari urujya n’uruza rw’impunzi zo muri 1959, 1962 n’indi myaka zatahukaga ziva mu bihugu bituranyi, ndetse abandi bahunga.

Umuturage wo mu Karere ka Bugesera wari umaze igihe akuwe mu rufunzo avuga ko tariki ya 04 Nyakanga 1994 yabonye abantu bari kumwe mu nkambi basubira mu masambu yabo.

Umuturage wo mu Karere ka Nyagatare, avuga ko uwo munsi yabyutse nk’ibisanzwe ariko saa tanu ari Ryabega aragiye inka, abona imodoka enye zirimo impunzi zitahuka ziva mu Gihugu cya Uganda.

Avuga kandi ko inka nyinshi zavaga muri Uganda zambukaga umupaka wa Kagitumba.

Agira ati “Nari ndagiye inka mbona ibimodoka byo mu bwoko bwa Tata byikoreye abantu bahungukaga bava muri Uganda icyo gihe berekezaga za Rwagitima. Ndibuka ko ari nabwo Kagitumba hanyuraga inka nyinshi ziza mu Rwanda.”

Sibomana Jean Nepomuscene wo mu Karere ka Gatsibo, avuga ko uwo munsi atazi ibyawo kuko yari mu bwihisho ahitwa i Mafu mu Murenge wa Muhura kuko bari bakigoswe n’Interahamwe zari i Bugarura.